قلت الوداع وجاوبت دمعة العين ****
تجرح بساتين الخدود الندية
وغضت وشفت بعينها الحزن حزنين****
وصاحت على الفرقة انا مو قوية
وجاوبتها ارجوك تكفين تكفين****
والله دمعك يشعل النار فيه
قالت تعاهدني عهاد المحبين****
الله يخون الي يخون خوية
قلت ابشري والي خلق لا تظنين****
حرام ماغيرك عشقت ادميه
وقصت شعرها قلت انا وش تسوين****
قالت ابي من غرتي لك هدية
ونادتني الغربة على الهم والبين****
احسب الايام روحة وجية
وفي كل ليلة ترتسم بين رمشين****
خيالها بين الرموش الشقية
غربة سنة في ذمتي غربة سنين****
متى على الله يلتقي الحي حية
خلاص هانت مابقى غير يومين****
خلاص قفت غربة جرهدية
ورجعت في خوفقي لها براكين****
ورجعت انا كلي لها جاذبية
وسألت مارودوا ونا اصيح هي وين؟؟؟
**** وكلن نثر من داخل العين ميه
وفي معمعة حزني تلقيت رمحين****
قالوا توفت غافلتها المنية
وفي غرغرتها ماذكرت غير حرفين****
تشهدت باسمك شفاة البنية
صدمة وجابتني على الأرض نصفين****
وشلون راحت دون ذنب وخطية
تكفون دلوني على القبر هالحين****
ماعاد فيني للصبر مقدرية
وجلست اطالع قبرها بين نصفين****
وجلست اضم اغلى النصايب عليا
واصيح وش بك ياغلاي ماتردين****
اشتقت همس شفاك النرجسية
وش فيك جيت من السفر ماتهلين ****
ماهي بك عادة ولاانتي ردية
وفي ظرف لحظة حاولت اجرح الدين****
وازيح تربة قبرها في ايديا
وبالغصب شالوني حشا تقل مسكين****
واصرخ بهم والله والله حية
ورجعت لدروب الشقى قبل عامين****
مادري من اللي صار فينا ضحية